नीती मोहनचा नवा सिंगल ‘मिर्झा’ प्रदर्शित

बॉलिवूडची लोकप्रिय गायिका आणि दमदार परफॉर्मर नीती मोहन हिने काल आपला वाढदिवस एका खास पद्धतीने साजरा केला. तिने आपल्या स्वतंत्र संगीत प्रवासातील एक महत्त्वपूर्ण पाऊल उचलत ‘मिर्झा’ हा नवा इंडी सिंगल जाहीर केला. हा ट्रॅक तिच्या कलात्मक व्यक्तिमत्त्वातील नव्या अध्यायाची झलक देतो आणि तिच्या भावविश्वाशी जोडलेल्या सखोल अभिव्यक्तीचे प्रतिनिधित्व करतो.

गेल्या दशकभरात अनेक सुपरहिट गाण्यांमुळे नीती मोहनने भारतीय संगीतक्षेत्रात स्वतःची वेगळी ओळख निर्माण केली आहे. “इश्क वाला लव्ह”, “जिया रे”, “नैनोवाले ने”, “तूने मारी एंट्रिया”, “खींच मेरी फोटो”, “साडी गली”, “नैन मतक्का” यांसारख्या हिट्सने तिला घराघरात पोहोचवले. केवळ प्लेबॅकच नव्हे तर विविध लाईव्ह परफॉर्मन्समुळेही तिच्या आवाजाची जादू प्रेक्षकांनी अनुभवली आहे.

तिच्या संगीत प्रवासात ए.आर. रहमान, प्रीतम, विशाल–शेखर, अमित त्रिवेदी, शंकर–एहसान–लॉय, संजय लीला भन्साळी, करण जौहर आणि आदित्य चोप्रा यांसारख्या नामांकित दिग्गज संगीतकार व फिल्ममेकरसोबतच्या सहकार्यांनी तिला व्यापक स्टाइल, स्केल आणि लोकप्रियता मिळवून दिली आहे.

१९ नोव्हेंबरला रिलीज होणारा ‘मिर्झा’ हा नीतीच्या स्वतंत्र कलात्मक दृष्टीकोनातून तयार झालेला अत्यंत भावपूर्ण आणि कथनप्रधान ट्रॅक आहे. व्यावसायिक प्लेबॅकपासून थोडेसे दूर जात तिच्या वैयक्तिक अनुभवांशी नाळ जोडणाऱ्या या गाण्यात प्रामाणिकपणा, पारदर्शक भावना आणि इंडी सीनमधील ताजेपणा जाणवतो.

प्रेक्षकांना ‘मिर्झा’चा पहिला अनुभव २२ नोव्हेंबरला NMACC Grand Theatre येथे मिळणार आहे. या खास कार्यक्रमात नीती आपल्या बहिणींसह रंगतदार परफॉर्मन्स देणार असून, तिच्या लोकप्रिय हिट गाण्यांसह ‘मिर्झा’मधील काही खास क्षणही सादर करणार आहे. त्यामुळे या परफॉर्मन्सबद्दल चाहते मोठ्या उत्सुकतेने वाट पाहत आहेत.

नव्या वर्षाची सुरुवात नीती मोहनसाठी संगीत, कला आणि नवीन अध्यायांनी समृद्ध अशी ठरणार आहे. ‘मिर्झा’मुळे तिच्या चाहत्यांना तिच्या हृदयाजवळच्या भावनांची आणि तिच्या सर्जनशीलतेची नवी ओळख मिळेल. तिच्या संगीत प्रवासातील ही निर्णायक पायरी प्रेक्षकांसाठीदेखील एक उत्साहजनक अनुभव ठरणार आहे.